| Świętochłowice - Forum bez polityki https://www.forum.swietochlowice.biz/ |
|
| Ōłberzyjszif a Angelina Jolie... https://www.forum.swietochlowice.biz/viewtopic.php?f=17&t=556 |
Strona 1 z 1 |
| Autor: | Ojgyn z Pnioków [ 09 wrz 2015, 7:42 ] |
| Tytuł: | Ōłberzyjszif a Angelina Jolie... |
Idzie to tyż posuchać na www.ojgyn.blog.onet.pl Srogi „transatlantyk”, taki ōłberzyjszift płynie bez ocyan. Łorŏz niy wiada po jakymu mŏ srogachnŏ awaryjŏ i idzie na dno. Dwiōch łozbitkōw dziyrżi sie gōminiannygo, plōmpanygo ringu, takigo szifowego retōngsringu i dopływŏ ku pobliskij wyspie. Te łozbitki to, na tyn przikłŏd, cufalowe: Jorguś Kopyciok i... Angelina Jolie. Wyspa, jak zawdy, jes bezludnŏ. Kej ci minōł blank piyrszy szok, zadziwiynie i prziszła łodwieczerz, łoba leżōm na plaży we łostatnich sztralach słōńca, kere zalazuje za horizōnt. Łorŏz łodzywŏ sie ta Angelina Jolie: – Sŏmy przecamć sam same, niy biere sie sam na gibki retōng dlō nŏs... – Nō... – Cheba blank sie nic niy stanie, kej bychmy tak ściepli swoji blank wilgłe prziłodziynie i deczko sie połobłŏpiymy, co? – Nŏ... Łobłŏpiajōm sie, a iże krew to niy ma woda, po pŏruch godzinach wypultane, wycyckane do łostatka lygajōm na piŏsek. Takŏ zytuacyjŏ powtŏrzŏ sie bez pŏra kolyjnych wiyczorōw. Za jakisi czŏs ta Angelina podlazuje ku Jorgowi, kery zachmulōny, smyntny siedzi na tyj plaży i zaziyrŏ na świytliczkowe wody morza... – Mōj ty nŏjmilyjszy, możno juzaś ściepnymy te nasze prziłodziynie, te nasze łoblycze... – Niy... nie mōm jakosik dzisiŏj chańdzi – pedziŏł Jorg i łobrōciōł gowa. – Pōnbōczku! A cōż tyż to sie stanōło? – Aaa... nic sie niy stanōło... – Nō, możno byda ci mōgła hilfnōńć? – libeźnie zagaduje Angelina. – A wiysz – łodpedziŏł Jorg – cheba mogesz... – Nō, tōż cōż mōm zrobić? Gŏdać jakesik szwajneraje, jakesik żadne świństwa? A możno... – Niy, niy... łoblyc ty te moje galoty... Łoblykła. – Hmmm... łoblyc moja hymda i mōj szaket... Łoblykła. – Hmmm... a terŏzki łoblyc mōj hut i wraź pod niygo swoje wosy... Zrobiōła, jak Jorg kŏzŏł. – Jaaaa... łoblyc jesce moje zōntbryle... Łoblykła, a na to Jorg pytŏ: – I co, dziołcha? Czujesz sie chocia ździebko tak jak chop? – Nŏ, ździebko... ja... – Tōż posuchej: STARY, DUPCZŌŁECH... ANGELINA JOLIE!!! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|